O comercio local é parte esencial da vida en Rianxo. É proximidade, confianza e trato directo. Con esa idea, a Asociación Rianxeira de Empresas pon en marcha PREMIARE, unha campaña que busca dinamizar as compras na vila cunha proposta diferente e participativa.
Entre o 13 e o 22 de abril, todas as persoas que realicen compras nos establecementos asociados poderán gardar os seus tíckets para participar na actividade central da campaña.
O día 22 de abril, a Praza do Concello converterase no escenario principal de PREMIARE. Alí instalarase un panel decorado con flores, no que cada unha agocha unha pregunta. Para participar, só hai que presentar un tícket de compra e comezar a xogar.
A dinámica é sinxela: a persoa participante irá escollendo flores por niveis, empezando pola fila inferior. Se responde correctamente, recibe un premio e pode seguir avanzando. Pero non todo é tan fácil: a medida que se sobe de nivel, tamén aumenta o risco.
Ao chegar ao terceiro nivel, aparece a decisión clave: plantarse e quedar cos premios conseguidos ou continuar xogando para optar a máis… sabendo que, a partir de aí, un fallo implica perder todo.
Este formato introduce un punto de emoción que fai que cada participación sexa distinta, ao tempo que anima á xente a achegarse, probar sorte e pasar un bo rato na praza.
Ademais, a campaña completarase con accións nas redes sociais da asociación, onde tamén haberá preguntas e pequenos premios para seguir fomentando a participación.
Con PREMIARE, a ARE aposta por unha forma diferente de impulsar o comercio local: máis próxima, máis dinámica e pensada para implicar á xente. Porque mercar en Rianxo non é só unha necesidade, senón tamén unha forma de apoiar á vila e ás persoas que forman parte dela.
Actividade confinancia pola Xunta de Galicia
Consulta aquí as bases da campaña